Thendral Audio Advertise About us
New User? | Forgot Password? | Email: Password: Login
Current Issue | Previous Issues | Author Index | Category Index | Organization Index | E-Magazine | Classifieds | Digital Downloads
By Category:
சின்னக்கதை | சமயம் | சினிமா சினிமா | இளந்தென்றல் | கதிரவனை கேளுங்கள் | ஹரிமொழி | நிகழ்வுகள் | மேலோர் வாழ்வில் | மேலும்
July 2016 Issue
தென்றல் பேசுகிறது | நேர்காணல் | அன்புள்ள சிநேகிதியே | சினிமா சினிமா | சின்னக்கதை | ஹரிமொழி | சிறப்புப்பார்வை | வாசகர் கடிதம் | சமயம்
எழுத்தாளர் | இளந்தென்றல் | நிகழ்வுகள் | சூர்யா துப்பறிகிறார் | மாயாபஜார் | சிறுகதை | அஞ்சலி | Events Calendar | பொது | நலம்வாழ | முன்னோடி
Tamil Unicode / English Search
சிறுகதை
விட்டு விலகி...
விருதுகள் பழுதடைகின்றன
ஒரு FBI டைரிக்குறிப்பு!
- ராமா கார்த்திகேயன்|ஜூலை 2016|
Share:
மாதவன் இந்தியா வந்த ஒருவாரத்தில் அவன் அபார்ட்மென்ட் காம்ப்ளெக்ஸ் பரபரத்தது. ஹரி படத்தில் வரும்சுமோக்களைப் போல சர்சர்ரென்று 7 கருப்பு கார்கள் அவன் வீட்டுமுன் வந்து இறங்கின. அவர்கள் மாதவனின் அலபாமா வீட்டிற்கு 3 டீம்களாக பிரிந்து, விசாரிக்கத் துவங்கினர். அவனின் சக காலேஜ் நண்பர்களைப் பிரித்து மேய்ந்தனர்.

அடுத்தநாள் மாதவனின் மெட்ராஸ் வீட்டு ஃபோன் ஒலித்தது. "மாதவா, வீட்டுக்கு FBI வந்து உங்களபத்தி விசாரிச்சாங்க. எல்லாம் நான் சமாளிச்சுட்டேன். நீங்க இந்தியாவிலிருந்து வந்ததும் மொத வேலையா அவங்க ஆபீசுக்கு போய்ப் பார்த்துடுங்க. எல்லாம் சரியா போய்டும். ஓகே? பை" என்று தனது காலிங் கார்டில் மிச்சம் தீர்ந்துவிடும் என்ற அவசரத்தில் நண்பன் பட்டென்று ஃபோனைக் கட் செய்துவிட்டான்.

மாம்பலத்தில் மடியாக கோவிலுக்குப் புறப்பட்ட மாதவனுக்கு இது ஒரு எதிர்பாராத தொல்லைபேசி அழைப்பு. தலைகால் புரியவில்லை. "என்னது FBl என்ன தேடுறாங்களா?" அந்தக் கருணாகரனின் கஞ்சத்தனத்தால் அரைகுறை விஷயமே புரிந்தது. மண்டை குழம்பியது. உடல் படபடத்தது.

"டேய், அந்த கருணா கால் பண்ணான்டா. FBI என்னைத் தேடுதுன்னு சொல்றான். எனக்கு ஒண்ணும் புரியலடா" என்று தனது நண்பன் சகாயத்திடம் சகாயம் தேடினான்.

"ஒன்னையுமா?" என்றான் சகாயம்.

"என்னடா சொல்ற? கொஞ்சம் புரியறமாரி சொல்லுடா. ஏற்கனவே அலபாமாலிருந்து வந்த ஜெட்லாக் போகல. நீவேற கொழப்பாத ப்ளீஸ்" என்று கெஞ்சாத குறையாக சகாயத்தை வேண்டினான் மாதவன்.

"ஆமாண்டா. எனக்கும் கால் பண்ணி ரெண்டே லைன்தான் சொன்னான். கஞ்சப்பய. அவன்கிட்ட செல்ஃபோனும் இல்ல. என்ன பண்றதுன்னு புரியல!"

"போலீஸ்னாகூட பரவால்லடா, FBI தேடுற அளவு அப்படி என்னடா பண்ணோம்? நம்ப என்ன தீவிரவாதியா? எங்க குடும்பம் போலீஸ் ஸ்டேஷன் வாசலகூட மிதிச்சதில்லடா…" மாதவன் கற்பனைகுதிரை ஸ்பீட் எடுக்க, அதை அடக்கினான் சகாயம்.

"ஆமா, நாங்கமட்டும் என்ன பின் லாடனுக்கு பேன் பார்த்த குடும்பமா? ஏண்டா கடுப்பேத்தற? இப்போ என்ன பண்ணலாம்னு சொல்லு? அலபாமாவுக்கு அஞ்சு லட்சத்தோடவும் MS எஞ்சினியரிங் படிக்கற லட்சியத்தோடவும் வந்தவண்டா. ஏன் கரியரே போய்டும்போல இருக்குடா. இந்தியாவுக்கு இந்த 2012ல வெகேஷன் வந்தது ஒரு குத்தமா? இது மட்டும் என் வீட்ல தெரிஞ்சது, அவ்ளோதான். நான் க்ளோஸ்" சகாயமும் உளறத் தொடங்கினான்.

"நீவேற வீட்ல எதுவும் உளறிவைக்காத. நீ கெளம்பி ஸ்பென்சர் ப்ளாசா வா. அங்க நேர்ல உக்காந்து பேசி ஒரு முடிவெடுப்போம்" என்று மாதவன் நிதானித்தான்.

"மாதவா... கோவிலுக்கு நேரமாச்சுடா, எவ்ளோ நேரம் ஃபோன்ல பேசுவ?" சந்தர்ப்பம் புரியாமல் அம்மா கூப்பிட்டாள்.

"இல்லம்மா, நீ போயிட்டு வா" என்று அம்மாவை சமாளித்துவிட்டு சகாயத்தைப் பார்க்க ஸ்பென்சர் ப்ளாசா விரைந்தான்.
"எனக்கு என்னமோ பயமா இருக்குடா... 9/11 அந்த நாட்டுல நடந்து ஒரு வருஷம்கூட ஆகல, எங்கம்மா வேற எனக்கு ஏழரை நாட்டு சனி ஆரம்பமாய்டுச்சுன்னு சொல்றாங்க. வெளிநாட்டு போலீஸ் அடியெல்லாம் வாங்கற அளவுக்கு எனக்கு சக்தி இல்லடா. நீ எடுத்த வீடியோ கேசட்ட பத்தரமா வெச்சுக்கோ. நம்ம அங்க போனவுடனே அவங்ககிட்ட போட்டு காமிச்சு நாம அப்பாவிங்கன்னு புரியவைக்கணும்" என்று இருவரும் தங்களை சிறை செல்லாமல் தப்பிக்கப் பலவித மாஸ்டர்பிளான்களைப் போட்டவாறு விடுமுறையைக் கழித்தனர். அந்த விடுமுறை அவர்களது வாழ்நாளில் வெகுநீண்டவிடுமுறையாக உணர்ந்தனர். நாள் ஒரு குழப்பமும் பொழுதொரு பீதியுமாய் அவர்களது 2012 விடுமுறை ஓடியது.

அவர்கள் இப்படிப் பரிதவிக்க என்ன காரணம்? சற்று முன்னே சென்று அலபாமாவில் சில வாரங்கள்ளுக்கு முந்தைய நிகழ்வுகளை அலசுவோம்!

*****


*** FBI வருவதற்கு 2 வாரம் முன்பாக ***

மாதவனின் அண்டைவீட்டில் வசிக்கும் அவனது மலேசிய நண்பன் வீரபத்ரன் ஒரு கேரக்டர். யாரும் பண்ணக்கூடாத செயல்களைச் செய்வதில் அவனுக்கு ஒரு அற்பசந்தோஷம். ஒருநாள் அவன் அலபாமா காட்டுப் பகுதிகளில் காரை ஓட்டிச்செல்ல, அங்கு ஒரு பெரிய மான் ஒன்று அடிபட்டு ரோட்டோரம் கிடந்தது. அவனும் அவன் நண்பர்களும் தாமே வேட்டையாடியது போல் அதன்முன் ஃபோட்டோ எடுக்கத் தொடங்கினர். பின்னணியில் சில கிலோமீட்டர் தொலைவில் இருந்த அணுசக்தித் தொழிற்சாலையைக் கவனிக்காதது அவர்கள் குற்றமில்லை! அங்கிருந்த செக்யூரிட்டி கார்ட்ஸ் பைனாகுலர்களை அவர்கள்மீது ஃபோகஸ் பண்ணத்துவங்கினர். அவர்கள் பார்வைக்கு யாரோ இரண்டு தீவிரவாதிகள் அவர்களது அணுசக்தி பவர்ப்ளாண்ட்டை விதவிதமாகப் போட்டோ எடுப்பது போலவே தோன்றியது. பறந்தன கால்கள் போலிசுக்கு. அன்றைக்கு வீரபத்ரன் எடுத்துச்சென்ற கார் மாதவனுடையது!


*** FBI வருவதற்கு 10 நாட்கள் முன்பாக ***

மாதவன் விடிய விடியக் கால்கடுக்க நின்று தாங்க்ஸ்கிவிங்கில் வாங்கிய கேம்கார்டரை உபயோகித்தே தீரவேண்டும் என்று ஒற்றைக்காலில் நின்றான். மறுநாள் காலை 10 மணிக்கு ஃப்ளைட் பிடித்தாக வேண்டும். நண்பர்கள் எவ்வளவு சொல்லியும் கேட்காமல், தானும் தன் தாந்தோணி நண்பர்களுமாய் சேர்த்து தெருத்தெருவாய் அந்த ஊரைக் கேம்கார்டரில் பதிவு செய்யத் துவங்கினர்.

"டேய், அந்த பெரிய ரெண்டு டவரை எடுடா... இந்தப் பக்கம் இருக்கற மாலை எடுக்காம வுட்டுடாத. எங்க வீட்ல யாருமே அமரிக்கா பார்த்ததில்ல. இதப் போட்டுக் காட்டி அவங்கள அசத்திடனும்" என்று நகரிலுள்ள அனைத்து அதி முக்கிய அம்சங்களையும் ஒன்றுவிடாமல் படம்பிடித்தனர். வீடு திரும்பும்போது மணி விடிகாலை 3. இவர்கள் ஊர் சுற்றிய நேரம் முழுக்க ஒரு போலிஸ் கார் அவர்களைப் பின்தொடர்ந்ததை அவர்கள் கவனிக்கவில்லை!


*** FBI வருவதற்கு 5 நாட்கள் முன்பாக ***

அடுத்த அத்தியாயம் இவர்கள் அந்தச் சின்ன ஏர்போர்ட்டில் அடித்த லூட்டி. மாதவனையும் சகாயத்தையும் வழியனுப்பச் சுமார் 40 பேர் கிளம்பிவந்தனர். எல்லார் கையிலும் புதிய டிஜிட்டல் கேமரா. அந்த ஏர்போர்ட்டை டிசைன் செய்த இஞ்சினியரைவிட பலவிதமான ஆங்கிள்களில் ஃபோட்டோகளை எடுத்தனர். அவர்கள் பேட்ச்சில் முதல் இரண்டு டிக்கெட்டுகள் இந்தியா செல்வதை ஒரு திருவிழாபோல் கொண்டாடினர். கேட்கவே வேண்டாம் - ஏர்போர்டில் இருந்த அனைவரது கவனத்தையும் இந்த கும்பல் கவர்ந்தது. "Officer, I am very suspicious about the happenings in the airport. I feel for my safety" என்று ஒரு 80 வயதுப் பாட்டி சந்தேகத்தைக் கிளப்ப, அந்தச் சின்ன ஊர் போலிசுக்கு சுமார் 20 கால்கள் அலபாமாவாசிகளிடமிருந்து பதட்டத்துடன் பறந்தன.

இதுவரை பிக்பாகெட், சிறு கொள்ளை போன்ற சில்லறை கேஸ்களையே பார்த்திருந்த அலபாமா போலிசுக்கு இது என்னமோ பெரிய லெவலில் பிளான் பண்ணுகிறமாதிரி தோன்றியது. நகரின் முக்கிய அடையாளங்கள், நியூக்ளியர் பவர் பிளான்ட் மற்றும் ஏர்போர்ட்டை விதவிதமாக ஃபோட்டோ எடுத்தவர்களை, அவர்கள் இதுவரை கண்டதில்லை. அதுவும் எல்லாம் குறுகிய காலத்தில் அடுத்தடுத்து நடப்பதை உணர்ந்து, 'இது என்னடா நம்ம சின்ன ஊருக்கு வந்த சோதனை' என்ற ரீதியில் தங்களது முதன்மை அதிகாரியிடம் ஆதாரங்களைச் சமர்ப்பித்தனர்.

அலபாமா போலீஸ் என்னமோ அல் கொய்தாவைப் பிடிப்பதைப்போல் பெருமிதத்தில் மிதந்தனர். அவர்கள் வியூகம் அமைத்திருப்பது அற்ப அமிஞ்சிக்கரை வாசிகளுக்கு என்று அவர்களுக்குத் தெரியவில்லை. அலபாமா போலீஸ் ஃபாலோ பண்ணும் இந்த அயனாவரம் அல்கொய்தா கும்பல் அவர்களின் தகுதிக்கு அப்பாற்பட்டமையால், அந்தக் 'கேஸை' FBI இடம் ஒப்படைத்தனர்.

FBIயும் அமெரிக்காவை மற்றொரு தாக்குதலில் இருந்து காப்பாற்ற தனது படையுடன் 'ஹரி' பட சுமோக்களைப்போல் கார்களில் மாதவனின் வீட்டில் களமிறங்கின.


*****


விசாரிக்கத் துவங்கின ஐந்தாவது நிமிடத்திலேயே இவர்கள் அல் கொய்தா அல்ல, அற்பப் பதர்கள்; பாம் வைப்பவர்கள் அல்ல, பாவப்பட்ட ஜந்துக்கள்; பயங்கரமானவர்கள் அல்ல, பவ்யமான மாணவர்கள் போன்ற விஷயங்கள் FBIக்கு புலப்பட்டு, தங்கள் நேரத்தை வீணடித்த அலபாமா போலிஸ் டிபார்ட்மண்டுக்கு டோஸ் விட்டது வேறு ஒரு கதை.

மாதவனையும் அவனது கும்பலையும் தங்களது டைரி குறிப்பிலிருந்து டக்கென்று நீக்கிவிட்டனர்!

ராமா கார்த்திகேயன்,
ஃப்ரீமான்ட், கலிஃபோர்னியா
More

விட்டு விலகி...
விருதுகள் பழுதடைகின்றன
Share: