Thendral Audio Advertise About us
New User? | Forgot Password? | Email: Password: Login
Current Issue | Previous Issues | Author Index | Category Index | Organization Index | E-Magazine | Classifieds | Digital Downloads
By Category:
சின்னக்கதை | சமயம் | சினிமா சினிமா | இளந்தென்றல் | கதிரவனை கேளுங்கள் | ஹரிமொழி | நிகழ்வுகள் | மேலோர் வாழ்வில் | மேலும்
April 2022 Issue
தென்றல் பேசுகிறது | நேர்காணல் | சாதனையாளர் | சிறப்புப் பார்வை | சின்னக்கதை | சமயம் | நூல் அறிமுகம் | சிறுகதை | பொது | அலமாரி
எழுத்தாளர் | இளந்தென்றல் | நிகழ்வுகள் | கதிரவனை கேளுங்கள் | Events Calendar | ஹரிமொழி | மேலோர் வாழ்வில் | வாசகர் கடிதம்
Tamil Unicode / English Search
கதிரவனை கேளுங்கள்
ஆரம்பநிலை நிறுவன யுக்திகள் (பாகம்-19e)
- கதிரவன் எழில்மன்னன்|ஏப்ரல் 2022|
Share:
முன்னுரை: ஆரம்பநிலை நிறுவனங்கள் தழைத்து வளர வேண்டுமானால், அவை கடைப்பிடிக்க வேண்டிய அணுகுமுறைகள், தந்திரங்கள், யுக்திகள் யாவை எனப் பலர் பல தருணங்களில் என்னைக் கேட்டதுண்டு. அவர்களுடன் நான் பகிர்ந்துகொண்ட சில குறிப்புக்களே இக்கட்டுரைத் தொடரின் அடிப்படை. CNET தளத்தில் வந்த Startup Secrets என்னும் கட்டுரைத் தொடரின் வரிசையைச் சார்ந்து இதை வடிவமைத்துள்ளேன். ஆனால் இது வெறும் தமிழாக்கமல்ல. இதில் என் அனுபவபூர்வமான கருத்துக்களோடு, CNET கட்டுரையில் உள்ள கருத்துக்களையும் சேர்த்து அளித்துள்ளேன். அவ்வப்போது வேறு கருத்து மூலங்களையும் குறிப்பிட்டுக் காட்ட உத்தேசம்.

★★★★★


கேள்வி: நான் சமீபத்தில் ஒரு நிறுவனத்தை ஒரு சக நிறுவனரோடு ஆரம்பித்துள்ளேன். ஓரிரு தேவதை மூலதனத்தாரிடமிருந்தும் சிறிய அளவு மூலதனம் பெற்று இதை நடத்தி வருகிறோம். இந்த நிலையில் விதை நிலை மூலதனத்தாரிடம் சென்று முயல்கையில் “இந்த யோசனை பெருவளர்ச்சியைச் சமாளிக்குமா” (will it scale?) என்று பலர் கேட்கிறார்கள். இவ்வளவு புதிய நிறுவனம் இப்போதே பெருவளர்ச்சியைப் பற்றி யோசித்து நடைமுறைப்படுத்த வேண்டுமா? இல்லை என்றால் எவ்வாறு மூலதனத்தாருக்கு நம்பிக்கையளிப்பது? விளக்குங்களேன்! (தொடர்ச்சி)
கதிரவனின் பதில்: பெருவளர்ச்சி கண்டபின் கடைப்பிடிக்க வேண்டிய வழிமுறைகளை ஆரம்பநிலையிலேயே அமல்படுத்த வேண்டிய அவசியமில்லை என்றாலும், நிறுவனம் மூலதனம் பெறவேண்டுமானால் அதைப்பற்றி யோசித்தே தீரவேண்டும் என்று சென்ற பகுதியில் கண்டோம். மேலும், பெருவளர்ச்சி என்றால், நிறுவனத்தின் விற்பொருள் அல்லது சேவை பெருமளவில் விற்கப்படும் நிலை என்றும் மூலதனத்தாரின் கவலை அப்போதாவது உங்கள் நிறுவனம் லாபகரமாக நடைபெற இயலுமா என்பது என்றும் கண்டோம்.

அதாவது விற்பொருளின் அடிப்படை அலகின் (basic unit) விற்பனை விலை, அதன் உற்பத்திச் செலவு மற்றும் வணிகரீதியான செலவு குறையுமா என்பதுதான் முக்கியமான கேள்வி. என்று முன் பகுதிகளில் கண்டோம்.

மேலும், அடிப்படை அளவின் செலவு என்பது நிலைத்த செலவு மற்றும் வேறுபடும் செலவு என்னும் இரண்டு வகைச் செலவுகளின் கூட்டுத்தொகை என்றும், ஒரே ஒரு பொருளை உற்பத்தி செய்தாலும் மாறாதது நிலைத்த செலவு என்றும், தொழிற்சாலை, தகவல் மையம், குறைந்தபட்ச மேகக்கணினி போன்று அதன் உதாரணங்களைப் பற்றியும் கண்டோம். மேலும், பெருவளர்ச்சி நிலையில் நிலைத்த செலவின் விகிதம் மிகக் குறைவாக இருக்கக்கூடும் என்றும், அதனால் லாபகரமாக நடத்த வேண்டுமானால் அடிப்படை விற்பனை அளவின் வேறுபாட்டு செலவு, விற்பனை விலையைவிடக் குறைவாக இருக்க வேண்டும் என்றும் கண்டோம். வேறுபாட்டுச் செலவைக் கணிப்பது எளிதல்ல என்றாலும் அதன் அம்சங்களை ஆராய்ந்து எவ்வாறு கணிப்பது என்பதை விவரித்து வருகிறோம்.

சென்ற அத்தியாயத்தில், உங்கள் விற்பனை அளவு அதிகரிக்க அதிகரிக்க, நீங்கள் பயன்படுத்தும் பகுதிப் பொருட்கள் அல்லது கீழ்மட்ட சேவைகளின் (lower level services) விலைகளும் தொகுதித் தள்ளுபடியின் (volume discounting) அடிப்படையில் குறையும், அதனால் உங்கள் அடிப்படை விற்பனை அளவின் வேறுபாட்டுச் செலவும் குறைந்து கொண்டே வரும் என்ற கருத்தை உதாரணங்களுடன் விளக்கினோம். இந்தக் கோட்பாடு பெருவளர்ச்சி நிலைக்கு எப்படிப் பயனளிக்கும் என்று இப்போது மேற்கொண்டு காண்போம்.



பெருவளர்ச்சி நிலையில் மொத்த நிலைத்த செலவு மற்றும் அடிப்படை வேறுபாட்டுச் செலவைக் குறைக்க வேண்டும் என்பதற்காக ஆரம்பத்திலேயே அதற்கான வழிமுறைகளை அமுல்படுத்திக் காட்டவேண்டும் என்பது அவசியமில்லை. பார்க்கப் போனால் அது நிறுவன வளர்ச்சிக்கு பெரிய தடையாகக்கூட வந்து முடியக்கூடும். ஏனெனில், செலவைக் குறைப்பது என்பது அவ்வளவு எளிதல்ல. அதற்கு மிக அதிகமான முயற்சி தேவைப்படும். அந்த முயற்சியை நிறுவனம் எந்த நிலையை அடையும்போது நடைமுறைக்குக் கொண்டுவர வேண்டும் என்று யோசிக்க வேண்டும்.

பொதுவாக நிறுவனம் ஆரம்ப நிலையில் இருக்கும் போது, நிறுவனத்தின் முயற்சிகள் மற்றும் கவனம் அனைத்தும் விற்பொருளைத் தயாரிப்பதிலும், முதல் விற்பனைகளை வளர்ப்பதிலும், வருவாய் ஓட்ட விகிதத்தை அதிகரிப்பதிலும் செலுத்த வேண்டும். பெருவளர்ச்சி நிலையில் பயன்படுத்த வேண்டிய வழிமுறைகளை, ஆரம்பநிலையிலே மேற்கொண்டால், வளர்ச்சிக்கான கவனம் கலைந்து, அதற்கான முயற்சியும் குறைந்து விடும் – அதனால் வளர்ச்சி விகிதம் குறைந்து போகலாம்.

உதாரணமாக, மென்பொருள் சேவை நிறுவனம் ஒன்றை எடுத்துக் கொள்வோம். அவர்கள் தகவல் மையம் அல்லது மேகக் கணினியின் மேலாண்மைக்கு (data center or cloud management) பணியாட்களின் கை உழைப்பை மட்டும் பயன்படுத்தினால், அவர்களது வேறுபாட்டுச் செலவு மிக அதிகமாகத்தான் இருக்கும். அதற்காக அவர்கள் மேலாண்மையைத் தன்னியக்கமாக்கும் (automation) முயற்சியில் அதி தீவிரமாக இறங்குவதாக வைத்துக் கொள்வோம். அப்போது, அந்நிறுவனத்தின் மென்பொருள் பொறியியலாளர்களை, மென்பொருள் பயன்பாட்டு அம்சங்களை (application software features) உருவாக்கும் பணியில் இருந்து மேலாண்மைத் தன்னியக்க மென்பொருளை உருவாக்கத் திசைதிருப்ப வேண்டியிருக்கும்!

ஆனால் நிறுவனம் மிக ஆரம்ப காலத்திலோ, மிகச் சிறியதாகவோ, அல்லது சற்று பெரியதானாலும் வேக வளர்ச்சி உள்ளதாகவும் இருந்தால் அடுத்தடுத்த வாடிக்கையாளர்களைப் பெறுவது மற்றும் ஏற்கனவே பெற்ற வாடிக்கையாளர்களைத் தக்க வைத்துக்கொண்டு அவர்களுக்கு மேலும் அதிக அளவில் விற்பது அல்லது சேவையளிப்பதில் கவனம் செலுத்தி மென்மேலும் வளர்ச்சியடைவதிலேயே கூர்மையான கவனமும், அதிகமான முயற்சியும் மேற்கொள்ள வேண்டும். அதனால், தன்னியக்கம் போன்ற செலவைக் குறைக்கும் முயற்சிகளைப் பெருவளர்ச்சி நிலையை அண்மையில் அடையப் போகிறோம் என்ற கணிப்புத் தோன்றும்போது மேற்கொண்டால் போதும்.

இதில் ஒரு சுவாரஸ்யமான விஷயம் என்றால், பெருவளர்ச்சி நிலையில் கூடச் செலவுக் குறைப்பு முயற்சிகளை மேற்கொள்ளாமல் வளர்ச்சிக்கான முயற்சிகளையே மேற்கொள்ளும் நிறுவனங்கள்தான் அதிகம்! ஏனெனில், தனியார் நிறுவன முதலீட்டாரும் (venture and private equity capital), ஏன் பொது நிறுவனப் பங்குச் சந்தையும்கூட, நிறுவன மதிப்பீட்டில் (valuation) வேக வளர்ச்சிக்குத்தான் மிக அதிக முக்கியத்துவம் அளிக்கிறார்கள்!

ஆனால் செலவுக் குறைப்புக்கு முக்கியத்துவம் இல்லவே இல்லை என்பதும் இல்லை.

அது எப்போது முக்கியத்துவம் பெறுகிறது, உங்கள் வேறுபாட்டுச் செலவின் பகுதிகள் என்னென்ன, அவற்றை எப்படிக் கட்டுப்படுத்தி மொத்த வேறுபாட்டுச் செலவைக் குறைக்கலாம் என்பதையெல்லாம் பற்றி அடுத்து வரும் பகுதிகளில் காண்போம்.

(தொடரும்)
கதிரவன் எழில்மன்னன்
Share: 






© Copyright 2020 Tamilonline