சரித்திரம் படைக்கவேண்டும்
நிதிதனை இழக்கலாம் நிம்மதி துறக்கலாம்
நியதிதனை மறக்கலாமோ
நெஞ்சமதில் கருமைதனை கொள்ளவுந் துணிவதோ
நீசனென் றாகத் தகுமோ?

விதியிடம் தோற்கலாம் வெற்றியை இழக்கலாம்
வெம்பிமனம் தளரலாமோ?
வீணாகும் வாழ்வெலாம்; வேண்டாத குணமதாம்
விரக்தியைக் கொள்ளலாமோ?

சதிதன்னை வென்றிடும் உறுதியைக் கொண்டிட்டு
சாதனை புரியவேண்டும்;
சாதனை செய்தபின் காணுவோர் போற்றிட
சரித்திரம் படைக்க வேண்டும்

மதிதன்னைக் கொண்டபலன் விதிதன்னை வெல்வதே
மகிமையிதை உணரவேண்டும்;
மாண்புற்ற வாழ்வினைக் கொள்பவன் தானென்றும்
மானிடன் என்றாகுவான்!


ஞானசேகரன்,
செர்ரி ஹில், நியூ ஜெர்ஸி

© TamilOnline.com